Изјава од Вториот состанок на БАЛКАН-СТУДЕНТ

За време на 5. и 6. 11. 2011 во Белград, е одржан вториот балкански студентски состанок на кој присуствуваа групите: Слободен Индекс (Скопје, Македонија), Студентски глас (Софија, Бугарија), n’Solidaritet  (Приштина, Косово), Синдикат Образовања АСИ (Белград, Србија), Независна студентска иницијатива Факултета музичке уметности (Белград, Србија) и две нови групи – Јединствена организација за социјализам и демократију (локална група од Сараево, БиХ), И Аутономни студенти (Ријека, Хрватска).

„Балкан Студент“ е мрежа на слободарски студентски групи кои се борат за укинување на Болоњскиот процес и негова замена со еманципаторско образование втемелено на прогресивни и рационални идеи, критичко мислење, укинување на преставничките студентски тела (на сите нивоа) и нивна замена со директно-демократско самоорганизирање на студентите, за остварување на бесплатно образование (потполно јавно финасирано високо образование), со зголемување на јавните трошоците за образование, понатаму за остварување на целосна политичка автономија на Универзитетот, без мешање на државата и трудовиот пазар.

На состанокот во Белград, мрежата исто така се солидаризираше со студентските блокади на Филолошки и Филозофски Факултет во Белград, и методите и целите, јасно осудувајќи го насилството од страна на управата на факултетот, осудувајќи го кршењето на автономијата на Универзитетот, со носењето на „полиција во цивилка“, ангажирање на обезбедување и секако осудувајќи ги нападите на неонацистичките групи.

„Балкан Студент“ е исто така дел од движењето „International Student Movement“ (Меѓународно студентско движење). Млади луѓе од целиот свет се здружени во борбата против комерцијализацијата на образованието и образование за потребите на трудовиот пазар. Солидарноста и заемната помош сметаме дека треба да станат главни вредности во студентските движења, како на балканско така и на светско ниво наспроти конкуренцијата која ја наметнува Болоњскиот процес и комерцијализацијата на образованието.

Преку споредбено анализирање на високо образовните системи во нашите земји дојдовме до заклучок дека постојат многу заеднички карактеристики. За почеток, во сите балкански земји постои изразена тенденција за зголемување на школарината и административните давачки. Државата од година во година го намалува буџетското давање за образованието со константно намалување на сите стандарди и квалитетот на образованието. Препуштени на пазарот на трудот, помалку бараните факултети живуркаат на ивицата на егзистенција, додека факултетите чии производи се барани на пазарот на трудот и образованието, заработуваат огромни суми на пари и се фаворизирани од страна на државата. За студентите е речиси невозможно да се самоорганизираат затоа што официјалните студентски преставнички тела, кои се во служба за манипулирање и контролирање на студентското незадоволство, држат монопол во студентското организирање. Ова не ја обесхрабрува нашата мрежа баш напротив ние растеме! Мрежата се шири, нови групи се приклучуваат, нашата сила расте.

Следниот состанок ќе се одржи во Сараево, во март 2012, во организација на Јединствене организације за социјализам и демократије из Босне и Херцеговине.

Еден Балкан-Една борба!

 Мрежа „Балкан Студент“

  Ноември,2011

Интернационален ден на студентите

На 28 октомври 1939 година студентите од Медицинскиот факултет на Универзитетот во Прага одржаа демонстрации за да ја одбележат годишнината од независноста на Чехословачка. Демонстрациите беа крваво задушени од страна на нацистичките власти, и притоа беше убиен студентот Јан Оплетал. На неговиот погреб присуствуваа илјадници студенти кои овој настан го претворија во анти-нацистички протест. Како последица на протестот, на 17 ноември нацистите ги затворија сите чехословачки универзитети, испратија над 1200 студенти во концентрациони логори, а девет студенти и професори беа стрелани без судење. Две години подоцна во Лондон овој датум почна да се одбележува како Интернационален ден на студентите.

Во ноември 1973, студентите од Политехничкиот Факултет во Атина организирале протест против „режимот на полковниците“ кој бил многу моќен во тоа време. Откако се забарикадирале и конструирале радио станица од опремата која ја нашле во лабораториите, почнале да емитуваат низ цела Атина. Нивните емитувања биле про-демократски, против хунтата која во тоа време била на власт, привлекувајќи голем број на нивни сонародници кон нивната борба. Во раните часови на 17ти Ноември воен тенк удрил во блокираниот влез на Политехничкиот Факултет за да ја разбие барикадата на студентите. Според официјалната истрага нема мртви студенти но многумина се повредени, а повредите им оставиле трајни белези.

Во 1989 година група независни студенти заедно со младите од „Социјалистичката Унија“ организирале масовни демонстрации за комеморација на Интернационалниот ден на студенти. Овој настан им дал можност на
студентите да го искажат своето незадоволство од владеењето на комунистичката партија. Иако започнал како мирен комеморативен настан, со доаѓањето на ноќта се претворил во насилен. Многумина меѓу 15.000 учесници на протестот биле брутално тепани од полицијата, “црвените баретки“ и други спроведувачи на законот. Гласината дека загинал другар поради полицска бруталност понатаму предизвикала настани кои тајната полиција не ги предвидела. Кадифената револуција се смета за еден од клучните моменти кои довеле до пад на комунистичкиот режим во Чешка.

Студентите секогаш биле двигатели на промените во општеството. Секогаш кога државата била во криза, студентите го кажувале своето мислење, дури и кога било против вредностите на тогашниот режим и верувања. Што ќе кажеме за денес? Студентите мора да ги искажат своите мислења и ставови и да се вклучат во ковањето на своите судбини! Ако не за нас, за генерациите после нас, да ги научиме што претходните генерации ни оставиле.

Блокиран Филолошкиот факултет во Белград

На адресата на Слободен Индекс стигна следново соопштение од нашите колеги и колешки од Белград:

Соопштение за јавноста  од пленумот на студентите на Филолошкиот Факултет

Министерството за образование [на р. Србија]  во петокот на 14.10.2011 одби да ги исполни барањата на студентскиот протест, притоа образложувајќи дека ние немаме никаков легитимитет и дека можат да прифатат преговори единствено со Студентската конференција на универзитетите од Србија (СКОНУС), а која беше прва што нѐ доведе до моменталната ситуација.

Оставени без одговор и други методи на борба, студентите на пленумот после протестот кој се одржа во петокот на 14.10.2011 одлучија дека блокадата на факултетот е единствен можен и ефикасен метод на борба кој го преземаме. Филолошкиот факултет од денес е под блокада, цела настава се одлага на неодредено време, и зградата на факултетот се наоѓа под контрола на студентите. Покрај наставата, сите останати активности ќе се одвиваат како и до сега. За време на блокадата ќе се организираат и алтернативни настани и едукативни активности организирани од страна на самите студенти.

Со ова се обидуваме да посочиме на понижувачките тешки и неподносливи услови во кои денес се наоѓа студентската популација, а кои произведуваат драстични последици на самиот живот на студентите, семејствата кои ги издржуваат студентите, па со самите тие и на целото општество. Студирањето станува недостапно за сѐ поголем број на луѓе, финансиски и општествен товар кој студентите сами го носат на својот грб практично станува невозможно да се поднесе. Сметки, стан, храна, книги, школарина се некои од многуте проблеми со кои студентите денес сами се борат бидувајќи приморани да паралелно со студиите бараат вработување кое не им е загарантирано дури ни по завршувањето на студиите. Тргнавме по пат кој има за цел да ја промени оваа ситуација по секоја цена.

Блокадата која ние ја спроведуваме не е напад, туку самата одбрана на образованието. Сето она што денес го правиме може да се види само како најпрогресивно движење во денешното општество, движење кое е самоорганизирано врз демократски принципи и без било какви претставници и студентски организации кои со години го поддржуваат правецот во кој образованието се насочило. Ние денес застануваме во одбрана на автономијата на студентите, во одбрана на демократијата и во одбрана на образованието кое мора да биде достапно за секого. Ова не е ограничена студентска борба, ова е општествена борба и борба за послободно и поправедно општество. Затоа, ние сме подготвени да се поврземе со секоја самоорганизирана општествена борба која ги дели нашите ставови и ги повикуваме сите кои тоа го сакаат и можат да нѝ се придружат во студентската борба и блокадите на факултетите кои се во тек и кои претстојат. Исто така, ги повикуваме сите колешки и колеги во текот на блокадата да го окупираат својот факултет и да ги искористат неговите ресурси и капацитети во активности кои ќе бидат од едукативна, работна и понатамошна организациона природа. Со блокада го отвораме универзитетот, на крајот на краиштата таа за нас претставува фестивал на светлоста и звукот кој може да нѐ врати во живот. Ќе го ослободиме универзитетот и ќе го одржиме слободен!

Знаењето не е роба! Сите на блокада!
Пленум на студетките и студентите на Филолошкиот факултет во Белград
17.10.2011

Plenum studenata i studentkinja Filološkog fakulteta
http://plenumfiloloskog.blogspot.com
http://twitter.com/filoloski_fak

Реакција по повод кривичната пријава од страна на полицијата противстудентката С.Б.

Независното студентско движење „Слободен Индекс“ остро ја осудува реакцијата на полицијата во случајот со фалсификување на уплатници од страна на студентката на Универзитетот „Св. Климент Охридски“ - Битола.

Овој случај на гонење на социјално загрозена студентка е уште еден показател за бескрупулозноста на институциите на системот и нивната негрижа за огромниот процент на граѓани кои живеејќи на прагот на сиромаштијата, не можат да си дозволат пристап ниту до јавните добра, како што е образованието.

Барањата за бесплатно образование не се засноваат врз идеолошки каприци, туку се нужност земајќи ги предвид лошите економски услови во кои се наоѓаат македонските студенти.

Властите, наместо да се занимаваат со вистинскиот криминал што го вршат институциите, вклучувајќи ги и самите универзитети, ги напаѓаат слабите и незаштитените.

„Слободен Индекс“ предупредува дека доколку студентката С. Б. продолжи да биде кривично гонета за случајов, ќе превземеме радикални мерки за нејзина заштита, и воедно ќе се обидеме да стапиме во контакт со неа, за заедно да изнајдеме решение.

Писмо за поддршка на студентските протести во Србија и Кампањата забесплатно образование

Независното студентско движење „Слободен Индекс“ кое делува во рамките на државниот Универзитет „Св. Кирил и Методиј“ во Скопје, цврсто ја поддржува и охрабрува независната иницијатива за организирање на протести против високата школарина на Белградскиот универзитет и Универзитетот за уметност во Белград.

„Слободен Индекс“ како движење кое веќе три години се бори против школарината, против болоњскиот процес и против хиерархиските парламентарни студентски структури, ја поддржува „Кампањата за бесплатно образование“ и им порачува на сите студенти на државниот универзитет да се обединат во борбата за подобар и поправеден образовен систем.

Имајќи во предвид дека сите земји од Балканот се соочуваат со слични услови на угнетеност преку неолибералните реформи во сите општествени слоеви, а особено во образовниот, сметаме дека е неопходно сите балкански студенти да се обединат, солидарно да делуваат и меѓусебно да се поддржуваат.

Солидарен поздрав,

Независни студентски покрет „Слободен Индекс“

06.10.2011 Скопје

Студентска пролет 2011 - Изрази се!

СТУДЕНТСКА ПРОЛЕТ

ИЗРАЗИ СЕ!

НА УЛИЦА НАМЕСТО ВО СТУДЕНТСКИ КУЛТУРЕН ЦЕНТАР

изложба на фотографии – графики – цртежи – ракотворби – театарска претстава – музика – уметнички перформанси – поетско читање

Имајќи многу што да понудиме, а немајќи каде, организираме акција на неколку локации низ Скопје.

Изложби, претстави, свирки, трибини, поетски читања, уметнички перформанси... Нам ни е потребен простор каде ќе можеме да се изразиме и да ги организираме овие случувања. Додека не го добиеме, ни останува улицата како алтернативно место каде ќе ја изразиме нашата креативност.

Овој настан е самофинансиран од активистите на Слободен Индекс. Секој потенцијален учесник кој може да придонесе на било каков начин (со опрема, со средства или едноставно со учество во организација на настанот) е добредојден.

ВАЖНО: Програмата за настанот е веќе пополнета со изложби на фотографии, графики, цртежи, ракотворби, инсталации, поетско читање, театарска претстава... Сепак, настанот е отворен за секој кој и ненајавено ќе дојде да се изрази со свое дело.

Млади сме, живи, креативни и полни со идеи. Бараме студентски културен центар во рамки на Универзитетот, отворен за сите студенти и млади луѓе!

ИЗРАЗИ СЕ!

ПРОГРАМА:

13.05.2011 ПЕТОК - 12:00-17:00

Градски Парк – Школка

(во координација со Bob Marley Day)

14.05.2011  САБОТА - 12:00-17:00

Плоштад Македонија

Изрази ја својата креативност под отворено небо во недостаток на студентски културен центар.

Поддржи ја независната културна сцена!

---

Независно студентско движење СЛОБОДЕН ИНДЕКС

Соопштение за јавноста по повод Балканската студентска средба

Минатиот викенд (16^ти и 17^ти април 2011) градот Скопје беше домаќин на состанокот во кој беа вклучени студенти од различни универзитети од целиот Балкан. Одговарајќи на повикот на Слободен Индекс (домаќини на оваа средба) активисти од различни групи, вклучувајќи "Синдикат за образование при АСИ (Анархо-Синдикалистичка Иницијатива)" (Белград), "Студентски Глас" (Софија), "n'Solidaritet (Солидарност)" (Приштина) и "Независна Студентска Иницијатива" (Белград) се состанаа за да разговараат за проблемите со кои се соочуваат студентите во нивните земји.

Високото образование, една од најголемите жртви во процесот на агресивна имплементација на нео-либералистичките трендови на Балканот, се урна поради реформите со кои "Знаењето и образованието се дистрибуира [продава] како и секој друг производ".

Балканскиот состанок на Интернационалното студентско движење е средба меѓу балканските студентски движења кои се борат за слободно и еманципаторско образование кое е загрозено од страна на Болоњскиот процес, нарушувајќи ја автономијата на Универзитетот од страна на државата и економските сили, како и високи трошоци, меѓу другото. Ова е прв сериозен обид за координација меѓу групите, што значи координација на активности, размена на информации и најважно работа според иста идеологија на целосна меѓусебна солидарност. Важна цел на средбата беше да се создаде унифицирана платформа која сите поединци и групи кои се идентификуваат со неа, можат да се придружи во заедничката борба.

"Balkan Student" (официјално име на мрежата од сега па натаму) ги гледа денешните универзитети како обични "фабрики" за производство на ефтина техничка работна сила без знаење и способност за критичко размислување. Идните активности на мрежата ќе се насочени кон борба против овие појави и ќе ја пропагира идејата за јавно финансиран и самостоен слободен универзитет, кој е ослободен од било какви политички и економски влијанија, со студентите и професорите организирани врз принципите на директна демократија.

Првата балканска студентска средба се одржа од 16^ти до 18^ти април 2011 и таа требаше да заврши со трибина на тема „студентско само-организирање“ на Универзитетот "Св. Кирил и Методиј "во Скопје. Студентската мрежа најави наредна средба во Белград на почетокот од следната академска година и договори одредени акции кои следат наскоро.

Најнови вести (18/04/2011):

Во 12:00 часот по локално време, група на активисти од гореспомнатите групи се подготвуваа да почнат со јавната дискусија на тема „студентско само-организирање“ во холот на Филозофскиот Факултет при УКИМ, бидејќи деканатот на Филозофскиот и Филолошкиот факултет не им дозволи да ја одржат трибината во некоја од предавалните/амфитеатрите. Бидејќи имаше значително медиумско присуство тие одржаа кратка прес конференција и продолжија кон холот на факултетот. Невообичената јавна дискусија продолжи без многу еуфорија и со бавен, но стабилен пораст на публиката. Околу 12:50 часот двајца припадници на обезбедувањето, најмени од страна на Универзитетот, се обидоа да го спречат собирот и беа агресивни кон некои од активистите. Во одреден момент состојбата изгледаше како да ќе ескалира во нешто поголемо кога обезбедувањето се обиде да го одземе мегафонот кој го користеше еден активист, но не беа во можност да го сторат тоа благодарение на живиот ѕид кој се создаде околу активистот со цел да го заштити (важно е да се спомене дека кон живиот ѕид се приклучија и некои од студентите од публиката кои не беа дел од активистите организатори на дискусијата). Револтираните студенти побараа лично да се сретнат со Деканот но бидејќи тој не бил присутен во тоа време, Продеканот за настава дојде наместо него. По краток разговор со Продеканот, активистите се согласија да го напуштат холот бидејќи програмата за јавната дискусија беше исцрпена. Групата тивко се расчисти. Некои од активистите беа следени од обезбедувањето се` додека не го напуштија дворот на Универзитетот.

Отворена дискусија

На ден 18.04.2011 (понеделник) со почеток во 12:00 часот пред Филозофскиот факултет при УКИМ Независното студентско движење - Слободен Индекс ќе одржи прес конференција по повод нарушената автономија на студентите во својот универзитет. Потоа ќе следи отворена дисусија на која ќе присуствуваат студенти од други балкански земји каде ќе се дискутира за проблемите на студентите во Македонија и во другите балкански земји. Принудени сме дискусијата да ја одржиме во самиот хол на Филозофскиот факултет бидејќи истиот повторно остана глув на молбата на Слободен Индекс за резервирање на просторија за одржување трибина заедно со нашите колеги од Балканот.

Трибината беше планирана како завршен дел од Балканска средба на студенти и студентски организации од Балканот кои се борат против комерцијализација на образованието т.е. за бесплатно, слободно и достапно образование за секого, а која се одржува во текот на овој викенд во Скопје и е дел од глобалната кампања „Пролет на отпорот“ (Spring of Resistance) на Интернационалното студентско движење.

Соопштение за измените во Законот за високо образование

Соопштение до јавноста во врска со предлог-измените
на Законот за високо образование

Независното студентско движење - Слободен Индекс смета дека предложените измени на Законот за високо образование кои ги најави МОН нема да доведат до реално подобрување на квалитетот на високото образование и застанува зад ставот на професорите кои не се сложуваат со истите. С.И. смета дека иако на високото образование во земјава му се потребни реформи од корен, ваквите измени не само што не се применливи и што го повредуваат интегритетот на професорите, туку и ќе имаат крајно негативни последици врз самите студенти. С.И. стои зад ставот дека за вистински да се подигне квалитетот на образованието, измените мора да доаѓаат одоздола, односно да бидат креирани и усогласени од студентите и професорите заедно, бидејќи само така би биле применливи и би кореспондирале со моменталните услови.

~ Еден свет - една борба ~
~ Образованието НЕ Е за продажба! ~

Независно студентско движење - Слободен Индекс

ТРИБИНА на тема „Можноста за бесплатно високо образование“

Во понеделник, 06 Декември, на Педагошкиот Факултет ќе се одржи трибина на која ќе се дискутира можноста за бесплатно јавно високо образование (субвенционирано од државниот буџет), за забрзаната комерцијализација и нејзините последици, како и за студентскиот активизам и мерките кои студентите треба да ги преземат со цел да извојуваат образование достапно за сите.

Денес, високото образование во Македонија ги фаворизира оние кои м...ожат да си дозволат да платат, наспроти оние кои имаат капацитет, но немаат средства. Државата со години покрива многу мал дел од трошоците, па студентите се принудени двојно да плаќаат, бидејќи од буџетот кој самите граѓани го полнат со даноци, се двои малку за образованието.

Студентите од целиот свет, обединети под името „Интернационално студентско движење“ (International Student Movement), апелираат дека образованието не е бизнис и не смее да се вреднува како продукт, роба за продажба, и се залагаат за бесплатно и квалитетно образование.

На оваа тема ќе поразговараат:

- д-р Билјана Ванковска, редовен професор на Институтот за безбедност, одбрана и мир при Филозофскиот факултет

- м-р Димитар Апасиев, магистер по правни науки, поранешен програмски уредник на Студентското радио

- Оливер Стефановски, активист во „Слободен Индекс“

По нивните изложувања, следува дискусија.

Трибината започнува во 11 часот.

Предавална 1 на Педагошки Факултет се наоѓа на втори спрат, над Ликовна Академија.